الرجال أفعال وأقوال ومبادي

والزمن ما علم البخل العطيّة

وباخص الدنيا يقود ولا يقادي

والصّواب اللّي يعلمك الخطيّه

والردي وجهٍ كريم النفس غادي

على ايدينك يالرّدي تكرم ايديّه

والنوايا بالصّدور وبالفوادي

والصلاح بلحمةٍ بالصّدر نيّه

هيه يا صوتٍ من البارح ينادي

بين خلجان الغلا والمقدريّه

نخلة التاريخ تنبت من بلادي

نخلةٍ صارت لها الدنيا هديّه

الوفا في ديرتي ما هو بعادي

من مهاد الطفل لا حد المنيّه

بين كفّينه رجالٍ للهجادي

ولاجل عينه لو تموت الروح حيّه

والرفيق اللّي أنوخ له ودادي

ما عليه من الزمان وما عليّه

الجواد يجيك من ظهره جوادي

والحديّه ما تجيب إلا الحديّه

علّ غصن ما يجي ظلّه برادي

تقلع جذوره قبل يظهر خويّه

ألف علم وألف درب وألف وادي

كلمها مرت من البارح هنيّه