أول المجد ست حروف نور وبياض

خطها سيف اخو نوره بدم الرجال

صفحة المجد مكتوب عليها الرياض

تلبس الشمس حتى في عتيم الليال

اشهد انها حضيضة واشهد انا حضاض

يوم صار ابو تركي طيب الراس فال

ديرة طبع اهلها ياردون الحياض

لا تعزوو لهم صوت يهز الجبال

ينثني كل غيم لاح برقه وناض

وينحني كل صعب في جبين المحال

ديرة صدرها العارض متونه عراض

كل متن يشيل سنين عز طوال

ديرة راع الأجرب صال فيها وخاض

قال ديرة جدودي ما يجيها الزوال

ديرة نفدها لو سولفت للفياض

سيرة لآل مقرن كنها من خيال

ديرة في ثراها كل زيزوم راض

لو تسولف قبور العود شابت عيال

ديرة حبها فعروق الامجاد فاض

استحلت قلوب العز حب ودلال

ديرة تفتخر في كل حاضر وماض

ديرة عزها آل سعود في كل حال

ديرة الله وأكبر ما عليها اعتراض

مجدها ديرتي مثل السما ما يطال