ما دريت و لكن البارح دريت
انها الفرقا حزينه يوم راح
طاح من عيني حديث و لا حكيت
كنت أضمه بين جفني بس طاح
باح من عين الحزن يوم انتهيت
و المولع لا تلومه لين باح
كنت أدور في ذنوب و لا لقيت
وكنت ادور لك معاذير و سماح
لو تعلمني متى هجرك نويت
كان اعرف ان الهوى ما به مزاح
آسف و لكن مع الذكرى سريت
من بداية هالغلا لين الجراح
ودي أعرف كيف في لحظه قويت
تاخذ من الروح كلمة ارتياح
لو نسيت انك بليله لي شكيت
و اني اللي شلت دمعك يوم ساح
و كنت احاول اسعدك لين ارتويت
و لين بعد الدمع فجر الثغر لاح
و لو ذكرت شوي في قلبك قريت
كان قلبي لك عن جراحك جناح
و انك اول و انك آخر كل بيت
و أنت ليلي و أنت في ليلي الصباح
سال من سحب الظما هجر و ظميت
و من غصونك يالشجر خافت رياح
لو نسيت فصدق اني ما نسيت
انك اللي خان وافي و استراح