في لحظةٍ فيها المشاعر تشابه

صار الحزن ثوب لبس هالجزيره

والحزن سيف لا ظهر من جرابه

أدما القلوب الصاطيات الشهيره

يا بوي لا عز السؤال وجوابه

ماجور لو كانت علينا كبيره

أخوي راح الله يعوضه شبابه

في جنة الخلد ويزيده بريره

تبكي العيون ويكفي القلب ما به

والشوف وكر ما لقا الصبح طيره

تكسّر الصوت وسكت من حكابه

من يعرف أحد صار يسوى نظيره

دايم إخوانه بين قلبه وبابه

ولا أبعده عنهم مواجه مصيره

حتّى تحت قبر تهايل ترابه

خاواه شيخٍ بالوفا فاق غيره

وفاك يا سلطان كلٍ درابه

وإنّا الوفا فينا جدود وعشيره

يا الله عسى القبرين مزن السحابه

وتريّح عيون المحب السهيره

يا سيّدي من يرجي الله ثوابه

تزيده الشدّات صبر وبصيره

والله وعد منهو صبر في كتابه

ومن يحتسب يجزاه ربّه بخيره

يا ماشي درب النّبي والصحابه

يا الصابر اللّي له مع الصبر سيره

لولا القلم خفته يتل الكتابه

ويحطّم ضلوع الحبايب زفيره

لقول قولٍ فيه جرح وحبابه

للغالي اللّي شالني في ضميره

قلت أتظاهر بالصبر في غيابه

أثر الحزن سيف وصدري جفيره