عزّو الهيبة بفقدان شيخ عظيم
عزّو الخال جعل الله يحسن عزاه
في وفاة الفقيد اللّي خذاه الكريم
ما بقي واحدٍ يسمع به إلا بكاه
المدامع تهاما والمشاعر حطيم
والوجيه اجهمت حزن يسولف غلاه
ليت الاعمار تفدي ما دفنّا الحشيم
يا كثر من يقول القبر أنا له فداه
راح ملجأ الدريك أبو الفقير اليتيم
كل من يلتجئ بحماه ينسى عناه
ودّعه مصحف في مسجده في العتيم
ودّعه صوت مذنٍ فالفجر للصلاه
عزو الدار روح شيخها والنديم
وعزو المجلس اللّي سعد من نصاه
عزو الذود والطوقي وعزو خريم
وعزو الرملة اللّي رملها قد وطاه
عزو البندق وطير بوصفه عديم
عزو القنص كلّه راح شيخ هواه
عزو المرجله راح القوي الحليم
راح شيخٍ عشقها والصبر من قواه
يوم يكتب علينا ما عليها مقيم
كلنا يوم يكتب بس يبقى سواه
رحمة الله على اللّي في سماء الطيب غيم
وبلّه الماطر اللّي من يشوفه رواه
لين ذكرت فعول الطيب فعله قديم
والمراجل عسفها واستقرّت حشاه
في خصاله لنا عبرة واريٍ حكيم
مشعل مايته اللّي تقدّا سناه
القصائد وأنا فالشيخ خصم وخصيم
لو كتبت ألف بيت ما توفي جزاه
كل ما اكتب يصير الشعر ليلٍ بهيم
مثل صبح الكفيف اللّي قديم عماه
عزو الخال لا راح الولد والحميم
وعزو الصبر فينا لابكي ما نساه
جعل قبر وضع به جنّة من نعيم
وجعله الرب يقبل دعوة اللّي دعاه
والعوض في هل المجد الشهير السليم
في شيوخٍ لهم بالمجد خطوة وجاه