لا جاء منهو من عنا الوقت محدود
يلقا المعزة بعد طول الهوانا
وان جاء محتاج يبي منه مقصود
يرجع بعجلات العطايا السمانا
مواقفه واجد تسولف بها النود
للي ظما من بعد فقده ظمانا
من خلقته ليله تهاليل وسجود
للدين ما يرضى نزول الطمانا
بالدين مشهود وبالطيب محمود
كل الخصال الطيبات الحسانا
خالي خذا راس المعالي على الكود
بالراي وان صعبت تجي بالسنانا
في شهرته بالجدي وسهيل مشهود
نجم سطع قرن من المجد بانا
حول عن الخيل المسماه والقود
وانكف يقول اللي خذينا كفانا
لا عد كل خاله أصير محسود
خالي تصير العشر عنده ثمانا
خالي محمد منبع الطيب والجود
شيخ على كسب المعالي تفانا
من شجرة في ظلها كل مظهود
يلقا المعزه والذرى والأمانا
عبد العزيز الخال والوالد سعود
معرب الجدين قدر وشانا